Эрткен хүннерде Тываның Культура яамызынга солун болгаш ажыктыг ужуражылга болуп эрткен. Аңаа “Тыва” КТРК кады ажылдажылга дугайында дугуржулганы кылган. Болган ужуражылгага “Тыва” КТРК-ның директору Оюмаа Көшкендей биле ТР-ниң культура сайыды Виктор Чигжиттен аңгыда, республиканың кол культура албан черлериниң удуртукчулары, журналистер киришкен.
2026 чыл “Тыва” КТРК-га кончуг онзагай юбилейлиг чыл болуп турар: телевидение тургустунганындан бээр 60, радио – 90 чыл оюн демдеглээр. Тываның МИЧ-ниң аразында кол черни ээлеп турар телерадиокомпанияның директору биле ТР-ниң культура сайыды кады ажылдажылга дугайында кайы-даа талага ажыктыг чугааны чоруткан. Чүл дизе, 2026 чылда Тываның Виктор Тока аттыг күрүнениң симфониктиг оркестри база 60 чыл оюн демдеглээр деп турар.
Төөгүден алгаш көөр чүве болза, телерадиокомпания 60 чыл бурунгаар Телевидение болгаш радионуң күрүне комитеди кылдыр тургустунган чылда, ооң баазазынга симфониктиг оркестр база аңаа ажыттынган. Төөгү справкаларында бижип турары-биле алырга, кажан симфониктиг оркестр тургустуна бээрге, радио болгаш телевидениениң дамчыдылгаларының үн каасталгазы көскүзү-биле экижип эгелээн болуп турар.
Ужуражылганың түңнелинде, симфониктиг оркестрниң репетицияларын катап база “Тыва” КТРК-ның төөгүден бээр туруп келген концерт студиязынга чорудуп эгелээрин удуртукчулар дугурушкан.
Оон аңгыда культура сайыды “Тыва” КТРК-ның баазазынга үн бижидер профессионал студияны дерииринге деткимчезин көргүзеринге беленин чугаалаан. Бир эвес үн бижидер профессионал студия катап ажылдап эгелээр болза, оркестрниң дириг хөгжүм аялгазының үн бижидилгезин шынарлыг кылып алыр арга ам-на тургустунар дээрзинге ужуражылгага киржип келген культура албан черлериниң удуртукчулары өөрүшкү-биле демдеглээннер.
Ужуражылганы доозуп тура Виктор Чигжит “Тыва” КТРК-ның удуртулгазынга четтиргенин илереткеш: “Тывавыстың культуразының дугайында бистиң республиканың чурттакчылары билир болуру күзенчиг: кандыг культуралыг бис, кайы хире бедик чадада турар, ооң тыныжы, судалының согуушкуну кандыгыл деп. Бистиң концерттер планын шагда-ла тургузуп каан. Оларны чүгле залда чыглып келген улус көөр эвес, коллегаларның дузазы-биле дорт дамчыдылга таварыштыр хөй чонче үндүр көргүзеринге белен бис”.
Медээ болгаш чурукту ТР-ниң Культура яамызындан алган.
“Шын” №4 2026 чылдың февраль 5