САЛГАЛДАРЫМ, ЧАССЫГЛАРЫМ
Шулуңнашкан чассыг үннери
Шулу ботту өөртүп чоруур,
Чуртталгамның утка-дөзү
Чулам оду уйнуктарым.
Сайлык куштар, сайдаяктар
Сагындырар чараштарым,
Салымымның дээди сөңү
Салгалдарым, чассыгларым.
Изиг чүрээм согуушкуну,
Изим базар уруг-дарыым,
Чуртталгаже көрүжүмнүң
Чулуу силер ажы-төлүм.
/ Дарый ООРЖАК.
ЧАЙНАП ЧОРЗУН
Үе-дүптен амга чедир чагыг сөстүг
Үнген-кирген арбын чоннуг өгбелерим
Үүжелеп каан, чечен-мерген чажыттарлыг
Үлегер домактарының утказы таан чараш.
Өзүп орар салгалдарга арттырар дээш,
Өттүр сөглээн мерген угаан тыва дылы
Өөрүшкүлүг чуртталганың таваан салып,
Өөр чонун өгбелерим өөртүп чоруур.
Дың-на чаңгыс күзелимниң чырык оду
Тыва чонум төөгүзү хөгжүп турзун,
Үлегерлиг домактарның мөңге чырыы
Үнген хүннүң херели дег чайнап чорзун.
/ Алефтина АДЫШАА.
“Шын” №7 2026 чылдың февраль 26