Тываның Баштыңы Владислав Ховалыг Москвага Россияның бойдус курлавырларының болгаш экология сайыдының оралакчызы Денис Буцаев-биле ажылчын ужуражылганы эрттирген. Республикага бок аңгылаар комплексти тудары — чугаалажылганың кол темазы болган. Регионда бир дугаар туттунар улуг хемчээлдиг бок арыглаар инфраструктура объектизи «Экологтуг чаагай чорук» национал төлевилелдиң бир кезээ болур «Хагдынчак эргилделиг экономика» федералдыг төлевилелдиң көргүзүглерин чедип алырынга идигни бээр.
Коммуналдыг кадыг бокту болбаазырадыр талазы-биле ведомстволар аразының ажылчын бөлүү экология адырында күрүне политиказын болгаш «Экологтуг чаагай чорук» национал төлевилелдиң «Арыг агаар» база «Хагдынчак эргилделиг экономика» федералдыг төлевилелдерин республикага чедимчелиг боттандырар дээш ажылдап турар.
Россияның хүрээлел оператору Тывага кадыг бок болбаазырадыр объектини тудар инвестиция төлевилелин 2024 чылда бадылаан. А 2025 чылда ол төлевилел күрүнениң чогумчалыг эксперт түңнелин алган. Кызыл кожуунда чер участогун комплекс тудуунга аңгылап, шупту негелделер ёзугаар ону албан ёзузу-биле бүрүткеп, тудугга чөпшээрелди берген. Бо чылдың апрель эгезинде чер ажылдары аңаа эгелээр.
Владислав Ховалыг келир үеде тудар объектиниң дугайында Денис Буцаевке дыңнаткан: бүдүрүлге чылда 70 муң тонна чедир бокту хүлээп болбаазырадыр, ооң 38 муң тонназын айыыл чок болдуруп хөмер, 27 муң хире тонна бокту катап ажыглаар кылдыр болбаазырадыр. Узуткаар чук аймаан болбаазырадып үлдүреткеш, техниктиг ажыглалче киирер.
Тываның Баштыңы чоокку 2-3 чылда тудар кылдыр планнаан бок аңгылаар чаа комплекс Кызылда бок төгер полигонну солуурун сайыттың оралакчызынга дыңнаткан. Владислав Ховалыг амгы үеде бар бок төгер черниң моон соңгаар дээштиг ажыглаарын организастаарынга деткимче көргүзерин федералдыг Бойдус курлавырларының яамызындан дилээн.
Федералдыг яамының экологтуг айтырыглар талазы-биле деткимчези республикага чугула, ооң иштинде Президентиниң бадылааны «Экологтуг чаагай чорук» национал төлевилелдиң сорулгаларын чедип алырынга: 2030 чылга чедир боктарны 100 хуу аңгылап, ооң 50 хуузун хөөп, 25 хире хуузун катап ажыглаар кылдыр болбаазырадыр.
Бистиң корр.
Чурукту интернеттен хоолгалаан.
“Шын” №6 2026 чылдың февраль 19